სამშენებლო მასალები, რომლის შესახებ აუცილებლად უნდა იცოდე სამუშაოების დაწყებამდე

სამშენებლო მასალების ხარისხი და მათი სწორად შერჩევა, წარმატებული პროექტისთვის მნიშვნელოვანი ფაქტორია.
ამ ბლოგში მოგიყვები ისეთი მასალების შესახებ, რომელზეც წარმოდგენა აუცილებლად უნდა გქონდეს, რათა
თითოეული ეტაპი წარმატებით დაასრულო და საბოლოო ჯამში, შედეგით კმაყოფილი დარჩე.

ყველაზე ხშირად გამოყენებული სამშენებლო მასალა

დავიწყოთ ბეტონით. ბეტონი ერთ-ერთი ყველაზე ფართოდ გამოყენებული სამშენებლო მასალაა.
ის გამოიყენება საძირკვლის, იატაკების და კედლების მოსამზადებლად.

მნიშვნელოვანია:

• შეარჩიოთ ხარისხიანი ბეტონი, რომელიც უნდა იყოს სწორი პროპორციებით შეზავებული (ცემენტი, ქვიშა, ხრეში, წყალი)
• არასწორი ტექნიკებით მომზადებულმა ბეტონმა, შესაძლოა, ბზარები გაიჩინოს
• ზოგიერთი სამუშაოსთვის აუცილებელია ორმაგად გამძლე, ანუ გამაგრებული ბეტონი (არმატურა)

ცემენტი - ძირითადი შემკვრელი მასალა

ერთ-ერთი უმთავრესი საშენი მასალაა, რომელსაც იყენებენ ბეტონისა და დუღაბის დასამზადებლად.
ცემენტის ზოგადი კონცეფცია ადამიანისთვის ცნობილი ჯერ კიდევ უძველეს დროში იყო. სწორედ
ხელოვნურად მიღებული შემკვრელი მასალები, თაბაშირი და კირი გამოიყენებოდა ძველ ეგვიპტესა და საბერძნეთში მასიური ნაგებობების
ასაშენებლად. სწორედ ამ ნივთიერებებს იყენებდნენ, როცა სჭირდებოდათ მტკიცე და ხანგრძლივობის მქონე კონსტრუქცია.

რას უნდა მიაქციო ყურადღება ცემენტის შერჩევისას:

• შეამოწმე წარმოების თარიღი - ძველი ცემენტი კარგავს თვისებებს, რამაც შესაძლოა, კარგი ხარისხის მასალა უხარისხოდ აქციოს
• შეინახე მშრალ ადგილზე, რადგან ტენიანობა ამ ტიპის მასალას საკმაოდ აზიანებს
• არ აირჩიო ყველაზე იაფი ვარიანტი, ამ შემთხვევაში, ხარისხი გადამწყვეტია.

აგური - მისი ტიპები და თვისებები

რაც შეეხება აგურს - ის ხელოვნური საშენი მასალაა, რომელიც მინერალური წარმოშობის ნარევებისგანაა დამზადებული და აქვს სწორკუთხა პარალელეპიპედის ფორმა. მის დასამზადებლად გამოიყენება ისეთი ნედლეული,

როგორიცაა თიხა, ტრეპელი და დიატომიტი. სილიკატური აგურის წარმოებისთვის კი როგორც წესი, კვარცის ქვიშა და კირი გამოიყენება.

რაც ყველაზე მთავარი და აუცილებელია, აგური საბოლოო სიმტკიცეს, ყინვაგამძლეობას და სხვა ტექნიკურ თვისებებს სპეციალური დამუშავების შედეგად იძენს, ეს შესაძლოა იყოს ღუმელში გამოწვა ან მაღალი წნევისა და ორთქლის ზემოქმედება (რაც განსაკუთრებით, სილიკატურ აგურზეა გამოიყენება ხოლმე).

საერთო ჯამში, ეს მასალა ფართოდ გამოიყენება მშენებლობის სექტორში, თუმცა შეიძლება ითქვას, რომ თანამედროვე ინდუსტრიული სტანდარტების პირობებში, აგური მეტ-ნაკლებად პოზიციასაც კარგავს. მიზეზი ისაა, რომ მისი წარმოება შრომატევადია, რის გამოც დღეს უფრო გამარტივებულად, მასიურად იყენებენ ბლოკებსა და სხვა ინდუსტრიულ მასალებს.

სამშენებლო სფეროში გამოიყენება სხვადასხვა ტიპის აგური:

• კერამიკულიაგური - წითელი ფერის, თიხისგან დამზადებული და ღუმელში გამომწვარი;
• სილიკატურიაგური - თეთრი ფერის, ქვიშისა და კირის ნარევზე დამზადებული;
• დეკორატიულიაგური - გამოიყენება ესთეტიკურიფასადებისთვის

ბეტონის ბლოკები - აგურის თანამედროვე ალტერნატივა

თანამედროვე სამშენებლო სექტორში აგურის ალტერნატივად ხშირად გამოიყენება ბეტონის ბლოკები, რომლებიც უფრო დიდია ზომით, მსუბუქია და სწრაფად მაგრდება. ბლოკების გამოყენება ზრდის შრომის პროდუქტიულობას და ამცირებს სამუშაოს ხანგრძლივობას.

არსებობს რამდენიმე ძირითადი ტიპი:

• ბეტონის ბლოკი - გამოიყენება საყრდენი კედლებისთვის, გამძლეა და იაფი
• გაზობლოკი - შედარებით მსუბუქი, გამოირჩევა თბოიზოლაციის ფუნქციით, მოსახერხებელი და კომფორტულია დასამუშავებლად
• პენობლოკი - მსუბუქია და როგორც გაზობლოკი, გამოირჩევა თბოიზოლაციის ფუნქციით

აგური და ბლოკი - რომელი როდის უნდა აირჩიოთ?

მშენებლობის პროცესში ხშირად ჩნდება კითხვა: აგური ჯობია თუ ბლოკი? ორივე მასალა კედლების ასაშენებლად გამოიყენება, თუმცა მათ შორის მნიშვნელოვანი განსხვავებაა: აგური ტრადიციული, გამძლე და საუკუნეების განმავლობაში “გატესტილი” მასალაა. ის მზადდება ძირითადად თიხისგან, რომელიც ფორმდება და შემდეგ სპეციალურ ღუმელში იწვის მაღალ ტემპერატურაზე. ამ პროცესის შედეგად აგური იძენს სიმტკიცეს, და ცეცხლგამძლეობას. იდეალურია ისეთი ნაგებობებისთვის, სადაც სიძლიერე და ხანგრძლივობა მნიშვნელოვანია. აგრეთვე, აგური კარგი ხმის დამხშობია ბუნებრივად გამოიყურება - რაც ბევრი ადამიანის თვალს იზიდავს, განსაკუთრებით ფასადებისთვის ან ინტერიერის დეკორატიული კედლებისთვის.

მეორეს მხრივ, ბლოკი შედარებით ახალი, მაგრამ თანამედროვე მშენებლობაში ხშირად გამოყენებადი მასალაა. არსებობს სხვადასხვა ტიპის ბლოკი - ბეტონის, გაზობლოკი, პენობლოკი და სხვა. ისინი მზადდება ან ბეტონის ნარევისგან, ან სპეციალური მსუბუქი სტრუქტურის მქონე ნარევებისგან, რომლებიც ჰაერის ბუშტუკებს შეიცავს. ამის წყალობით, ბლოკი ბევრად მსუბუქია აგურთან შედარებით და ბევრად უკეთ ინარჩუნებს სითბოს. გარდა ამისა, მისი ზომები უფრო დიდია, რაც საშუალებას იძლევა, კედლები სწრაფად აიგოს და სამუშაო დრო შეამციროს. გამოდის, რომ იმავე ფართობის კედლის ასაშენებლად ბლოკით დაახლოებით ორჯერ ნაკლები ერთეული დაგჭირდება, ვიდრე აგურით. ეს ამცირებს სამუშაოზე დახარჯულ დროს და ზოგჯერ - ხარჯსაც.

არ უნდა გამოგვრჩეს ბლოკის უარყოფითი მხარეებიც. ზოგიერთი ტიპის ბლოკი ნაკლებად გამძლეა მექანიკური დატვირთვის მიმართ და დამატებით დამცავ ფენებს საჭიროებს (მაგალითად, ბოჭკოვანი ბადით გაძლიერებას ან გარე მოპირკეთებას). აგრეთვე, გაზობლოკი და პენობლოკი ტენიანობის მიმართ უფრო მგრძნობიარეა, ამიტომ საჭიროებს წყლის დამცავ მასალებთან ინტეგრირებას.

საბოლოოდ, შეიძლება ითქვას, რომ აგური გამძლეა, მისი დამონტაჟება შედარებით იწელება ხოლმე და თანაც, უფრო ძვირია, ხოლო ბლოკი სწრაფი და ეკონომიურია, აქვს თბოიზოლაციის ფუნქციაც, თუმცა, ზოგჯერ დამატებით გაძლიერებას საჭიროებს. არჩევანი დამოკიდებულია პროექტის ტიპზე, ბიუჯეტზე, კლიმატზე და შენობის დანიშნულებაზე.
პრაქტიკაში კი ხშირად ამ ორი მასალის კომბინაციასაც იყენებენ - ფუნქციურიცაა და ეკონომიურიც.